«Проект төбәкнең яшьләр сәясәтен гамәлгә ашыруда актив катнашучы яшь активистларга, студентларга һәм белгечләргә ярдәм итүгә юнәлдерелгән. Конкурс нәтиҗәсендә 49 җиңүче сайлап алыначак», – диде ул.

Руслан Семенов сүзләренә караганда, Татарстан Рәисе Рөстәм Миңнеханов тәкъдиме белән 2012 елдан бирле тормышка ашырылучы әлеге программа республикада яшәүче 538 яшь кешегә торак шартларын яхшыртырга ярдәм иткән. «Яшьләр торак конкурсы – торак мәсьәләсен хәл итү мөмкинлеге генә түгел, ә туган төбәктә калырга, эшләргә һәм үсәргә ярдәм итүче кызыксындыру чарасы да. Конкурска ел саен 300 ләп гариза кабул итәбез. Быел тораклы булырга теләүче актив яшьләр тагын да күбрәк булыр дигән өметтә калабыз», – диде министр урынбасары.

Татарстан Студентлар лигасы президенты Шамил Якупов әйтүенчә, конкурста Татарстанда теркәлгән 18 яшьтән 35 яшькә кадәр булган Россия гражданнары – студентлар, аспирантлар, яшь галимнәр, белгечләр, иҗтимагый оешмалар активистлары, яшьләр сәясәте өлкәсендә хезмәт яки иҗтимагый эшчәнлек белән шөгыльләнүчеләр катнаша ала. Конкурсның шартлары гадәти социаль ипотеканыкына туры килә. Гаиләдә бер кешегә туры килгән торак мәйданы 18 квадрат метрдан артмаска, ипотека түләүләрен каплау өчен җитәрлек керем, беренчел кертем буларак торак бәясенең 10 проценты кадәр акча түләү мөмкинлеге булырга тиеш.

Яшьләрне торак белән тәэмин итү «Яшәү өчен инфраструктура» илкүләм проекты максатларына туры килә.