Дәүләт дәрәҗәсендәге игътибар һәм финанс мөмкинлекләре

Бүгенге көндә Россия Федерациясе Президенты дәрәҗәсендә яшүсмерләрне һәм балаларны эш белән тәэмин итү мәсьәләсе, хезмәт тәрбиясе беренче урынга куела. Шул максаттан, 2026 нчы елда Татарстан Республикасы тарафыннан Актаныш районына җәйге чорда 60 баланы эшкә урнаштыру өчен махсус финанс мөмкинлекләре бүлеп бирелде.

Актаныш районы яшүсмерләре агымдагы елның 1 нче июненнән үк актив рәвештә эшкә керештеләр. Программа кысаларында беренче айда гына да халыкны эш белән тәэмин итү үзәге аша 26 бала рәсми рәвештә хезмәт куя башлады. Әлеге юнәлештәге эшчәнлек июль һәм август айларында да дәвам итәчәк.

Социаль яклау һәм өстенлекләр

Назыйф Салихов ассызыклаганча, эшкә урнаштыру барышында аерым игътибар социаль яклауга мохтаҗ гаиләләргә бирелә:

Безнең төп максатыбыз — балаларны эшкә урнаштыру гына түгел, ә махсус хәрби операциядә (СВО) катнашучыларның балаларын, шулай ук авыр тормыш хәлендә калган гаиләләрдәге яшүсмерләрне хезмәткә җәлеп итү. Бу юнәлештә без «Игелек үзәге» социаль хезмәт күрсәтү үзәге белән берлектә тыгыз хезмәттәшлек итәбез.

Хәзерге вакытта балалар «Башак» колхозында хезмәт куя, шулай ук Байсар авылындагы «Хашимов» предприятиесенә урнаштыру буенча да эш алып барыла.

Шартлар һәм матди яклау

Халыкны эш белән тәэмин итү үзәге аша эшкә урнашкан барлык яшүсмерләрнең хезмәте закон таләпләренә туры китереп башкарыла. Социаль фондта аларның рәсми эш стажлары исәпләнә бара. Моннан тыш, һәр балага хөкүмәт тарафыннан аена 2650 сум күләмендә өстәмә пособие түләнә.

Районда балаларны эшкә җәлеп итүдә аеруча активлык күрсәтүче оешмалар:

• «Актаныш» агрофирмасы

• «Әнәк» агрофирмасы

• «Сетевая компания» филиалы

• Нур Баян исемендәге хуҗалыгы

• «Нур» хуҗалыгы

Аерым алганда, «Сетевая компания» үз инициативасы белән «Бабайда кунакта» паркы территориясен чистарту һәм тәртиптә тору өчен ай саен 5 баланы эшкә ала һәм июль аенда да бу состав яңартылып торачак.

Остазлык һәм катгый контроль

Яшүсмерләрнең эш урыннарындагы эшчәнлеге даими контрольдә тотыла. Беренче чиратта, документларның дөреслеге тикшерелә. Бүлек белгечләре авыл җирлекләре башлыклары белән берлектә эш урыннарына чыгып, балаларның хезмәт шартларын бәялиләр. Шунысы мөһим: эшкә урнашкан һәр балага үз эшенең нечкәлекләрен өйрәтүче һәм юнәлеш бирүче махсус наставник (остаз) беркетелә.

Хезмәт кануннары һәм эш сәгатьләре

Балаларның яшь үзенчәлекләренә карап, хезмәт кануны нигезендә эш сәгатьләре катгый чикләнгән:

• 14 яшьлек балалар көненә 4 сәгатьтән артык эшләргә тиеш түгел.

• 14 яшьтән 16 яшькә кадәрге яшүсмерләр өчен эш көне озынлыгы — 6 сәгать.

• 16 яшьтән 18 яшькә кадәрге егет-кызлар көненә 8 сәгатькә кадәр хезмәт куя ала.

Актаныш районында оештырылган әлеге хезмәт кампаниясе яшь буынны хезмәт сөючән итеп тәрбияләүдә һәм аларга үз кесә акчаларын эшләп алуда зур мөмкинлек булып тора.