Бәйрәм көнендә республика халкын җылы кояш түгел, ә салкынча һәм җилле һава каршы алачак.

Татарстан Гидрометүзәге мәгълүматларына караганда, 9 майда республикада алмашынучан болытлы һава сакланачак, урыны белән кыска вакытлы яңгырлар явуы көтелә. Шулай ук җилнең секундына 15 метрга кадәр көчәюе ихтимал.

Төнлә һава температурасы +7...+12 градус тәшкил итәчәк. Көндез исә термометр баганалары +13...+18 градуска кадәр генә күтәреләчәк.

Казанда бәйрәм төнендә +9...+11 градус булса, көндез һава +14...+16 градуска кадәр җылыначак.

Шул ук вакытта 7 һәм 8 май көннәрендә республикада җылырак һава саклана: урыны белән яшенле яңгырлар булса да, температура +27 градуска кадәр күтәрелергә мөмкин.

Синоптиклар Җиңү көне чараларында катнашырга җыенучыларга һава шартларын истә тотарга киңәш итә. Белгечләр сезонга туры килгән кием сайларга, үзең белән зонт алырга һәм көчле җил вакытында агачлар, реклама конструкцияләре һәм ныклы булмаган корылмалар янында тормауны сорый.

Рәсми һава торышы хәбәрләрен күзәтеп барырга һәм хәвефсезлек кагыйдәләрен үтәргә киңәш ителә.

Билгеле булганча, «Экологик иминлек» илкүләм проекты гамәлгә ашырыла.