Борынга сулышны ачып җибәрә торган тамчы тамызу гадәте операциягә китерергә мөмкин. Борын-колак-тамак табибы Павел Савельев “RT” хәбәрчесе белән әңгәмәсендә шулай дип белдергән.

Белгеч аңлатып үткәнчә, мондый дарулар салкын тию сәбәпле борынга томау төшкәндә сулышны ачу өчен билгеләнгән. Гадәттә аларны 5-7 көн генә кулланырга киңәш ителә.

Әмма кайберәүләр мондый тамчыларга бәйлелеккә төшә: мондыйлар башта, ОРВИ һәм томау үтмәгән кебек тоелганлыктан, дару тамызуны дәвам итә, ә берникадәр вакытлардан соң борынның лайласыман тышчасы кан тамырларын мөстәкыйль генә тәртиптә тотудан туктый. Шул сәбәпле даруга бәйлелек барлыкка килә.

Нәтиҗәдә борынның лайласыман тышчасындагы кан тамырлары даими рәвештә шешенке халәттә тора.

“Шуның аркасында кеше препаратсыз гына борын белән сулыш алудан туктый, тамчыларның да тәэсире кими. Кайберәүләр алардан көне буе куллана, хәтта төнлә дә, уянып китеп, тамыза”, – дип билгеләп үткән табиб.

Моннан тыш тамчылардан озак файдалану лайласыман тышчаны киптерә, борыннан кан агуга, исне начаррак сизә башлауга китерә.

Ә инде әлеге препаратларга бәйлелек кайвакыт борын эчендәге сулыш юлларын томалауга да китерергә мөмкин. Бу очракта бары тик операция ярдәмендә генә сулыш алуны торгызырга мөмкин, дигән белгеч.