Яңа кагыйдәләр нигезендә мондый документларны пациентлар гына түгел, ә аларның якын туганнары да ала алачак.

Бу хакта РИА Новости агентлыгына Дәүләт Думасы депутаты Каплан Панеш (ЛДПР) хәбәр иткән.

Аның сүзләренчә, яңартылган тәртип Россия Сәламәтлек саклау министрлыгы тарафыннан расланган һәм медицина документларын алуны күпкә гадиләштерүне күздә тота.

Төп үзгәрешләрнең берсе – медицина белешмәләрен һәм бәяләмәләрен пациентның якын туганнарына да бирү мөмкинлеге. Әмма бу хокук законда каралган очракларда гына кулланылачак, ә кирәкле мәгълүматлар пациентның медицина документациясендә булырга тиеш.

Моннан тыш, әгәр закон белән башка таләпләр билгеләнмәгән булса, медицина белешмәләрен һәм бәяләмәләрен катгый расланган шаблон буенча гына түгел, ирекле формада да рәсмиләштерергә мөмкин булачак.

Тагын бер мөһим яңалык – документларны электрон рәвештә бирү тәртибе гадиләштерелә. Моның өчен пациенттан электрон форматка аерым ризалык алу таләп ителмәячәк.

– Бу – сәламәтлек саклау тармагын цифрлаштыру һәм медицина мәгълүматларыннан файдалану мөмкинлеген киңәйтү юнәлешендә мөһим адым, – дип билгеләп үткән Каплан Панеш.

Шулай ук 1 сентябрьдән психиатрия, наркология һәм ВИЧ-инфекцияле пациентларга ярдәм күрсәтүче медицина оешмалары өчен медицина ярдәме профилен күрсәтүче махсус мөһерләрне мәҗбүри куллану турындагы норма да гамәлдән чыгарылачак.

Депутат сүзләренчә, барлык үзгәрешләр медицина документларын рәсмиләштерү процессын тизрәк, уңайлырак һәм сыгылмалырак итәчәк.

– Бу, аеруча, өлкән яшьтәге яки каты авырулы якыннарын караучылар өчен мөһим. Кайчак белешмә алу өчен кешене поликлиникага алып килүнең кирәге булмый. Документны табиб аша яки электрон рәвештә рәсмиләштерергә мөмкин булачак. Иң мөһиме – кирәкле мәгълүмат пациентның медицина картасында булырга тиеш, – дип аңлаткан парламентарий.

Яңа тәртип, белгечләр фикеренчә, медицина документларын алуны җиңеләйтергә һәм гражданнар өчен кәгазь мәшәкатьләрен киметергә ярдәм итәчәк.