Очрашу Мөхәррам аеның изге көне — Гашурә көнендә узды. Мөфти белән бергә хастаханә җитәкчелеге, табиблар һәм медицина хезмәткәрләре дә аралашуда катнашты.

Камил хәзрәтне медицина оешмасында баш табиб урынбасары Сергей Валерьевич Кривошапко каршы алды һәм хастаханәнең эшчәнлеге белән таныштырды.

Аннары госпиталь бүлегендә дәваланучы махсус хәрби операциядә катнашкан хәрбиләр белән очрашу булды. Анда 40тан артык кеше катнашты. Мөфти алар белән аралашты, рухи үгет-нәсыйхәтләрен җиткерде, сорауларына җавап бирде һәм тизрәк савыгуларын теләде.

Очрашу барышында Камил хәзрәт дога кылып, илнең тынычлыгы, халыклар арасында татулык һәм кешеләргә иминлек теләде.

Чара ахырында Татарстан мөфтие сугышчыларга күчтәнәчләр тапшырды.

Татарстан мөселманнары Диния нәзарәте яраланган хәрбиләргә рухи ярдәм күрсәтү эшен дәвам итә. Имамнар госпитальләрдә дәваланучы сугышчылар янына барып, алар белән очраша, аралаша һәм рухи терәк күрсәтә.