Бүген, 19 мартта, Татарстанда аномаль җылы һава торышы сакланачак. Синоптиклар фаразлавынча, температура фоны күтәрелүен дәвам итә, ә көндезге һәм төнге күрсәткечләр арасындагы аерма 22 градуска кадәр җитәчәк. Бу хакта «Татар Информ» хәбәр итә.

ТР Гидрометеорология үзәге мәгълүматларына караганда, республикада алмашынучан болытлы һава саклана. Явым-төшем көтелми. Иртә белән төнлә төшкән томан таралачак.

Җил үзгәрүчән юнәлештә секундына 2–7 метр тизлек белән исәчәк. Төнге һәм иртәнге сәгатьләрдә, шул исәптән Казанда да, юлларда урыны белән көчле бозлавык күзәтеләчәк.

Төнлә һава температурасы -1…-6 градус, көнчыгыш районнарда -10 градуска кадәр төшәчәк. Көндез исә +4…+9 градуска кадәр җылыначак, ә кайбер көнчыгыш районнарда температура +12 градуска кадәр күтәреләчәк. Казанда көндез +9…+11 градус көтелә.

Шул ук вакытта соңгы көннәрдә республикада берничә температура рекорды теркәлгән. 13–18 март көннәрендә Казанда төрле еллардагы рекорд күрсәткечләр яңартылды. Моңа кадәр, 10 мартта, 1908 елның температура антирекорды да үзгәртелгән иде.

Метеорологлар мәгълүматларына караганда, якындагы көннәрдә дә аномаль җылы һава торышы сакланачак һәм яңа рекордлар ихтимал. Әмма ТР Гидрометеорология үзәге башлыгы Феликс Гоголь сүзләренчә, республикага яңадан салкыннар кайтырга мөмкин.