Биредә ул Актаныш муниципаль районы башлыгы Ленар Зарипов белән очрашу үткәрде. Очрашуда шулай ук Татарстанның төньяк-көнчыгыш төбәге казые, Актаныш районы имам-мөхтәсибе Руслан хәзрәт Мортазин катнашты. Камил хәзрәт райондагы дини вәзгыять белән танышты һәм мөхтәсибәт эшчәнлеге хакында фикер алышты.

Сәфәре барышында Мөфти Камил хәзрәт шулай ук Үзәк мәчет янында урнашкан Мәгърифәт үзәге төзелешен карады. Әлеге үзәк Мөхәммәдьяр Солтанов исемен йөртәчәк – ул Россиянең бишенче мөфтие, чыгышы белән Актаныш районыннан.

Алга таба Мөфти Камил хәзрәт районкүләм ифтар мәҗлесендә катнашты – ул “Батыр” спорт комплексында үтте һәм бер өстәл янына 450ләп дин кардәшебез җыелды.

Авыз ачу ашында район башлыгы, имам-мөхтәсиб, җитәкчеләр, имамнар, абыстайлар, мәчет мәхәлләләре, хөрмәтле аксакаллар һәм волонтёрлар, эшмәкәрләр, шулай ук социаль ярдәмгә мохтаҗ кешеләр, махсус хәрби операциядә һәлак булучыларның гаиләләре катнашты.

Бөтендөнья татар конгрессы Башкарма комитеты җитәкчесе урынбасары – ТР буенча бүлекчәләр белән эшләү комитеты җитәкчесе Ирек Шәрипов та ифтарның шәрәфле кунагы булды.

Мөфти Камил хәзрәт район имамнарына шәһадәтнамәләр – дини эшчәнлек алып бару хокукын раслаучы документлар тапшырды. Хәзерге вакытта Актаныш мөхтәсибәтендә 57 мәчет эшли.

Ифтар вакытында Мөфти Камил хәзрәт Рамазан аеның һәм ураза тотуның фазыйләтләре турында вәгазь сөйләде, шулай ук махсус хәрби операциядә катнашучылар, һәлак булганнар һәм Ватан иминлеге өчен дога кылды.

ТР мөселманнары Диния нәзарәте рәисе, Татарстан Мөфтие Камил хәзрәт Сәмигуллин Рамазан аенда гадәттәгечә республика районнарында халык белән күчмә очрашулар үткәрә. Ул Лениногорск, Түбән Кама, Зәй, Буа, Арча, Әлмәт, Нурлат, Тукай, Теләче районнарында булып кайтты.

ТАТАРСТАН РЕСПУБЛИКАСЫ

МӨСЕЛМАННАРЫНЫҢ ДИНИЯ НӘЗАРӘТЕ