Алар хәрби хезмәткә китәргә теләүчеләрне табып, түләү бәрабәренә тыл подразделениеләренә урнаштырырга вәгъдә иткән. Бу хакта Россия Эчке эшләр министрлыгының рәсми вәкиле Ирина Волк хәбәр иткән. Мошенниклар хәрбиләрнең банк счетларыннан контракт төзегән өчен бирелгән түләүләрен һәм хезмәт хакларын да урлаган. Эчке эшләр министрлыгына 24 кешенең шул рәвешле зыян күргәнлеге мәгълүм. Аферистлар китергән гомуми зыян 44 миллион сумнан артып киткән.

Оперативниклар, Росгвардия белән берлектә, Киров өлкәсендә һәм Татарстанда яшәүче 7 кешене тоткарлаган. Әлеге факт буенча “Мошенниклык” статьясы нигезендә җинаять эшләре кузгатылган. Хокук саклау органнары, җинаятьнең барлык нечкәлекләрен билгеләп, хәрбиләрнең акчасына кул сузарга мөмкин булган башкаларны эзли, дип билгеләп үткән Волк. Исегезгә төшерәбез: моңа кадәр Эчке эшләр министрлыгыннан СВОда катнашучыларга һәм аларның гаиләләренә түләүләргә бәйле мошенниклык очраклары турында кисәтелгән иде. Аферистлар, хәрбиләр һәм ветераннардан шәхси мәгълүматларын, акчаларын урлау, шулай ук интернет-ресурслар һәм мессенджерлар аша мошенниклык программаларына җәлеп итү өчен, янәсе, аларга бер тапкыр түләүләр яки компенсацияләр бирелергә тиешлеге турында ялган хәбәрләр җибәрә.