Бәйрәм намазы иртәнге 7:00 сәгатьтә башланды. Имам-мөхтәсиб Руслан хәзрәт Мортазин мөселманнарны изге Рамазан ае тәмамлану белән котлады, аның рухи әһәмиятен ассызыклады. «Рамазан аенда ураза тоту — ашаудан тыелу гына түгел, ә күңелне чистарту, иманны ныгыту», — дип мөрәҗәгать итте ул үзенең вәгазендә.

Ленар Зарипов бәйрәмнең районыбыз халкы өчен әһәмиятле булуын билгеләп үтте:

— Бүген шундый матур кояшлы көн. Киләчәк көннәрегез дә һәрберегезнең кояшлы булсын! Ураза тоткан, ифтар мәҗлесләре оештырган, Коръән укыган, дога кылган, сәдака биргән райондашларыбыз изге ниятләр белән бу эшләрне башкарды. Бу бик мөһим күренеш.

Тыныч тормышта, якты, матур мәчетләрдә бәйрәмнәрне каршыларга мөмкинлек биргән махсус хәрби операциядәге егетләргә рәхмәт! Яу кырында һәлак булган сугышчыларга, аларның гаиләләре алдында баш иеп рәхмәт әйтәбез!

Алдагы тормышта да бүгенге бәйрәмдә гыйбадәт кылгандагы кебек бер-беребезгә терәк булып матур яшик, – дип, район башлыгыбыз Ураза гаете теләкләрен юллады.

Догалар кылганнан соң гаеткә килгән җәмәгать якыннарын сөендерергә өйләренә, гаиләләренә ашыкты.

Актаныш районында Ураза бәйрәме дини вакыйга гына түгел, төрле яшьтәге һәм төрле һөнәр ияләрен берләштерүче уртак кыйммәтләр бәйрәме дә. Ураза гаетендә төрле буын, бигрәк тә яшьләрне, балаларны күрү аеруча шатлыклы. Ураза гаете безгә бердәмлек, үзара ярдәмләшү һәм изге гамәлләр кыйммәтен искәртә.

Айнур Гыймадиев фотолары