Қазақстанның кейбір қалаларында баспана арзандады

Қазақстанда бір айда бастапқы тұрғын үй мен жалға алу бағасы төмендеді, деп хабарлайды LS.

Ұлттық статистика бюросының мәліметінше, осы жылдың наурыз айында республика бойынша жаңа тұрғын үйдің бағасы орташа есеппен бір шаршы метрге 486,5 мың теңгені құрады, бұл ақпанға қарағанда 0,4%-ға арзан.

Атырауда – 4,8%-ға (ш.м. үшін 393,9 мың теңге), Өскеменде – 1,8%-ға (376,3 мың теңге), Астанада –1,1%-ға (575,2 мың теңге) және Павлодарда – 0,3%-ға (346,8 мың теңге) төмендеді.

Алайда, кейбір қалаларда тұрғын үй қымбаттады. Таразда құнның 3,8%-ға (ш.м. үшін 351,4 мың теңге), Талдықорғанда – 1,6%- ға (323,6 мың теңге), Ақтауда – 0,9%-ға (409,7 мың теңге) өсуі байқалды.

Басқа қалаларда бағалар өзгеріссіз.

Жылжымайтын мүліктің қайталама нарығында бір айдағы баға 0,2%-ға өсті – орташа есеппен шаршы метріне 502,8 мың теңге.

Жезқазғанда тұрғын үйдің құны 4,8%-ға, шаршы метріне 355,6 мың теңгеге дейін; Атырауда – 2,5%-ға, 416,8 мың теңгеге дейін. Астанада – 1,2%-ға, 613,6 мың теңгеге дейін өсті.

Бірақ бағаның төмендеуі Ақтауда – 2,5%-ға (ш.м. үшін 328,5 мың теңге), Алматыда – 0,9%-ға (592,2 мың теңге) және Оралда – 0,5%-ға (357,3 мың теңге) төмендегені байқалды.

Қалған қалаларда айтарлықтай өзгеріс болған жоқ.

Сонымен қатар, ел бойынша бір айда пәтер жалдау 0,6%-ға, бір шаршы метр үшін 4,1 мың теңгеге дейін арзандады.

Көптеген қалаларда бағалар өзгеріссіз қалды.

Алматыда жалға алу бағасы ақпан айына қарағанда 1,7%-ға (шаршы метріне 5,1 мың теңге), Өскеменде – 1,2%-ға (2,7 мың теңге) арзандады.

Бұл ретте бағаның өсуі Шымкентте – 3,6%-ға (ш.м. үшін 3,2 мың теңге) және Петропавлда – 1,5%-ға (2,8 мың теңге) байқалды.