8-10 апрельдә Казанда XX Россия венчур форумы узачак.

Россия венчур форумы (РВФ) – Россиядә венчур һәм туры инвестицияләр, технологик эшкуарлык өлкәсендә иң зур вакыйга. 2005 елда нигез салынганнан бирле форум илнең инновацияле экосистемасын үстерүдә мөһим баскычка әверелде.

"РВФ-2026"ның төп темасы — «Технологик лидерлык – киләчәккә инвестицияләр». Форум кысасында Россиянең фәнни-технологик лидерлыгы, технологик эшкуарлык платформасын үстерү, инвестиция инфраструктурасы, базарлар үсеше трендларын анализлау мәсьәләләре игътибар үзәгендә булачак.

Стартаплар өчен әлеге форум проектны инвесторларга тәкъдим итүдән тыш, финанслар җәлеп итәргә, акселерация узарга һәм ментор ярдәмен алырга, шулай ук тармактагы хезмәттәшләр һәм экспертлар белән эшлекле элемтәләр урнаштырырга ярдәм итә. Ә инвесторлар өчен бу яхшы стартаплар эзләү һәм аларның мөмкинлекләрен бәяләү, базардагы төп вакыйгалар буенча фикер алышуларда катнашу һәм стратегик хезмәттәшлек урнаштыру өчен яхшы мөмкинлек.

Өч көн дәвамында катнашучылар венчур индустриясенең актуаль тенденцияләре, турыдан-туры инвестицияләр һәм Россиядә технологик эшкуарлыкны үстерүнең стратегик юнәлешләре турында фикер алышачак.

Ике дистә ел эчендә форум илнең венчур һәм туры инвестицияләр, технологик эшкуарлык һәм инновацион үсеш буенча фикер алышу өчен төп мәйданга гына әйләнеп калмады, халыкара дәрәҗәдәге мөһим вакыйгага әверелде, ди оештыручылар. Быел форум 25тән артык дәүләттән – БДБ, Африка, Азиядән, Якын Көнчыгыш илләрен дә кертеп, инновацион экосистема вәкилләрен берләштерәчәк. Анда 6 000нән артык катнашучы, 300дән артык спикер һәм эксперт катнашыр дип көтелә. Форум экспозициясендә, 30 амбициоз халыкара проектны да кертеп, 150 югары технологияле стартап тәкъдим ителәчәк.