«Безнең монда очрашу өчен бик яхшы мөмкинлегебез бар. Бүгенге мәҗлестәге барлык кунакларыбызга рәхмәт әйтәсем килә. Мин биредә Чечнядан, башка төбәкләрдән килгән кешеләрне күрәм. Чит ил кунакларына, илчелек вәкилләренә, һәм мәскәүлеләргә – Татарстанның дусларына рәхмәт белдерәм», – дип искәртте Рөстәм Миңнеханов.

ТР Рәисе «Рамазан чатыры»нда Татарстан кичәсенә килгән махсус хәрби операциядә катнашучыларга аерым рәхмәт белдерде.

«Бүген бөтен ил, бер йодрык булып, неонацизм белән көрәшә. Һәм, әлбәттә, безнең геройларның үрнәге бик тә мөһим», — дигән ышаныч белдерде ул.

Миңнеханов РФ мөселманнары Диния нәзарәте рәисе, мөфти шәех Равил Гайнетдинне аерым телгә алды.

«Республикабызны күрсәтергә мөмкинлек биргәнегез өчен чын күңелдән рәхмәт белдерәм. Мәскәү — безнең башкалабыз, һәм без монда рәхәтләнеп киләбез», — диде ул.

«Гомумән алганда, авыр вакытта без бердәмлекне, Россия эчендәге бердәмлекне, дөнья белән бердәмлекне күрсәтергә тиеш. Мондый катлаулы вазгыятьтә кемнәр Россия белән бергә калды? Ислам дөньясы. Бу бик тә мөһим. Биредә ислам илләреннән килгән вәкилләр бар, без бик күп чаралар үткәрәбез. Аларга зур рәхмәт», — диде Татарстан Рәисе.

«Һәм барысына да тынычлык телисем килә. Россиянең җиңүенә өметләнәм һәм илебездән читтә дә тынычлык урнашыр дип ышанам. Барыгызга да сәламәтлек һәм уңышлар телим. Бик зур рәхмәт», — дип сүзен төгәлләде Рөстәм Миңнеханов, шуннан соң дәүләт бүләкләре тапшырды.

Ел саен үткәрелә торган «Рамадан чатыры» мәдәни-хәйрия проектын РФ мөселманнары Диния нәзарәте һәм башкала Хөкүмәте ярдәмендә Мәскәү мөселманнары Диния нәзарәте оештыра. Әлеге инициативаның алыштыргысыз җитәкчесе — РФ мөселманнары Диния нәзарәте рәисе урынбасары, Мәскәү мөфтие Илдар хәзрәт Әләүтдинов. 21нче «Рамадан чатыры» 19 мартка кадәр эшләячәк, ул 21-22 мартка билгеләнгән«Ураза бәйрәме» традицион шәһәр фестивале белән тәмамланачак, – дип яза Татар-информ.