Одесса өлкәсендә бер ханым үзенең автомобилендә хатын-кыз булып киенгән ир егетне (хәрби хезмәткә чакыру яшендәге) Молдавиягә алып чыкмакчы булган. Бу хакта «ТАСС» яза.
Чик сакчылары паспортларны тикшергәндә документында 1954 елда туган дип күрсәтелгән «хатын-кыз»га игътибар иткән. Машинада яулыкка төренеп утырган «әбекәй» хокук саклау органнары хезмәткәрләре белән аралашудан баш тарткан.
«Өлкән» яшьтәге пассажир урынына йөртүче җавап биргән. «Әби»гә яулыгын салуны сорагач, аның 30 яшьлек ир-ат булуы ачыкланган.
Аңа чик аша законсыз чыгу омтылышы буенча административ беркетмә тутырылган. Йөртүчегә исә пассажирны Украинаның дәүләт чиге аша законсыз чыгару омтылышы өчен җинаять җаваплылыгы янарга мөмкин.