Аны «Җәй» республика үзәге һәм «Беренчеләр хәрәкәте»нең төбәк бүлеге башлап җибәрде, дип хәбәр иттеләр ТР Яшьләр эшләре министрлыгы матбугат хезмәтендә.

Тантаналы ачылыш «Урам» экстрим-паркында узды. Чарада 150ләп тыңлаучы һәм чакырылган кунаклар катнашты, калганнары онлайн форматта кушылды. Катнашучыларны Татарстан Яшьләр эшләре министры Азат Кадыйров сәламләде. Аның сүзләренчә, мәктәпне ачу балалар ялын һәм сәламәтләндерүне оештыру системасын үстерүдә мөһим этап булачак.

Укыту программасына теоретик һәм норматив база, тәрбияви һәм идеологик юнәлешләр, шулай ук педагогика һәм психология нигезләре кертелгән. Практик өлештә булачак вожатыйлар лагерьлар инфраструктурасы, программалар үзенчәлекләре һәм сменаларны оештыру тәртибе белән танышачак.

Министр билгеләп үткәнчә, мондый белем бирү проектлары балалар ялы өлкәсенә әзерлекле кадрлар җәлеп итәргә мөмкинлек бирә, шул ук вакытта яшьләрне эш белән тәэмин итүгә дә ярдәм итә. Бу «Яшьләр һәм балалар» милли проекты бурычларына туры килә.

Вожатыйлар мәктәбенә кызыксыну зур: 700дән артык кеше укырга гариза биргән. Аларның күбесе — Татарстан халкы, әмма дәгъвачылар арасында Россиянең башка төбәкләре вәкилләре дә бар. Катнашучыларның яше 18 яшьтән 55 яшькә кадәр.

Тыңлаучылар спикерларга — балалар ялын һәм сәламәтләндерүне оештыру буенча төбәк үзәкләре җитәкчеләренә — сораулар бирде. Алар һөнәри тәҗрибәләре белән уртаклашты һәм әлеге өлкәдәге эшчәнлекләре турында сөйләде.

Вожатыйлар мәктәбе ТР Яшьләр эшләре министрлыгы йөкләмәсе нигезендә төзелде. Проектны «Җәй» республика үзәге һәм «Беренчеләр хәрәкәте»нең төбәк бүлеге оештыра. Оештыручылар арасында «Черноморец» республика үзәге, «Сәләт-Ак Барс» яшьләр үзәге, «Костер» яшьләр үзәге һәм «Байтик» сәламәтләндерү-мәгариф комплексы да бар.

Ике ай дәвамында катнашучылар теоретик әзерлек узачак һәм белемнәрен практикада ныгытачак. Уку тәмамлангач, аларга дәүләт үрнәгендәге сертификатлар тапшырылачак. Аннан соң чыгарылыш укучылары Татарстан балалар лагерьларында эшли алачак, дип хәбәр иттеләр профильле ведомствода.