Сәхнәгә беренче адым

Динә Кыям кызының театрга юлы очраклы гына башланган. Ул 10 нчы сыйныфны тәмамлагач, колхоз идарәсендә эшәгән, шул вакытта беренче тапкыр сәхнәгә чыга.

-Ул елларда Иске Кади авылы халкына “Эте балак” спектаклен күрсәттек. Госман абый белән Гашия апа авыл яшьләрен җыеп спектакль әзерли иде. Без дә шунда катнаштык. Ул вакыттагы хисләр әле дә күңелдән китми, — дип яшьлек хатирәләре белән уртаклашты Динә апа.

Шул чактан аның йөрәгендә сәнгать учагы кабынган. Ләкин соңрак тормыш мәшәкатьләре белән ул сәхнәдән ераклашкан.

Театрга кире кайту

Җиде ел элек Якты Тау авылы клубы мөдире Ләйсән Нотфуллина Динә апаны яңадан театр уйнарга чакырган.

-Иң беренче “Әниләр һәм бәбиләр” спектаклен куйдык. Хәзер ел саен берәр сәхнә әсәре әзерлибез. Быел Бөек Җиңү бәйрәменә “Миләш чыпчыклары”н сәхнәләштердек, мин майор ролен уйнадым. Бу безнең коллектив өчен зур горурлык, — диде Динә Кыям кызы.

Динә апа әйтүенчә, спектакльләргә әзерләнү — аның өчен ял һәм рухи азык. Алар авыл апалары белән бергә репетицияләргә җыелалар, рольләрен өйрәнәләр, образга керәләр.

Кул эшләре — икенче тормышы

Динә Кыям кызының куллары да бик оста. Чигү эше аның тормышында аерым урын алып тора — матур чәчәкләр төшерелгән мендәр тышлары күз явын алырлык.

-Буш торырга яратмыйм. Аеруча кыш көннәрендә төсле җепләр һәм инәне кулга еш алам. Эшләгән елларда моңа вакыт булмады. Кул эше белән вакытның узганы да сизелми, бөтен җанымны биреп эшлим. Шулчак башка кирәкмәс уйлар керми. Бер эштән туеп китсәм, икенче төрлесенә тотынам. Бәйләргә дә яратам, — дип сөйләде ул.

Чыннан да, Динә апаның өендә аның кулы белән эшләнгән әйберләр күп. Һәрберсенә җан җылысы бирелгән.